आगामी फागुन २८ गतेदेखि हुन लागेको साफ महिला च्याम्पियनसिप फुटबलका लागि खेलाडीहरु प्रशिक्षणमा व्यस्त भएका छन् । विराटनगरको शहीद रङ्शालामा हुने उद्घाटन खेलमा घरेलु टोली नेपालसँग भुटानले सामाना गर्दैछ ।विराटनगरको दिल्ली पब्लिक स्कुलमा अहिले खेलाडीहरुलाई राष्ट्रिय महिला फुटबल टिमका मुख्य प्रशिक्षक हरि खड्काले प्रशिक्षण दिइरहेका छन् । खेलाडीलाई मानसिक तथा शारीरिक रुपमा तन्दुरुस्त बनाउने काम भइरहेको प्रशिक्षक खड्काले बताए ।

घरेलु मैदानमा हुने महिला साफ च्याम्पियनसिपका लागि यसपटक खेलाडीहरुलाई तीव्र तयारीका साथ प्रशिक्षण दिइएको खड्काले बताए । खेलाडीहरु पनि अन्तिम तयारीमा जुटिसकेका छन् ।यसअघि भएका प्रतियोगिताहरुमा नेपाल ३ पटक फाइनल र १ पटक सेमिफाइनलमा पुगेको थियो ।

नेपाली टोली यसपटक भने उपाधि कब्जा गर्ने दाउमा छ । पहिलो पटक विराटनगरमा हुन लागेको अन्तराष्ट्रिय फुटबल प्रतियोगिता विराटनगरको खुशीको विबषय भएकोले खेल क्षेत्रका व्यक्तिहरु उत्साहित छन् ।

प्रकाशित समय १२:३७ बजे