Nepalese Flag २०७९ असार १३ गते सोमबार   |   June 27, 2022

संसद्‌मा न्यायालयको अडियो प्रकरण

न्युज कारोबार काठमाडौं असार ९, २०७९       

jeewan-bima-jaruri-chha संसद्‌मा न्यायालयको अडियो प्रकरण

प्रतिनिधिसभाका सांसद लिलादेवी सिटौलाले न्यायाधीश र अधिवक्ताबीचको घुस लेनदेन भएको भनिएको संवाद सार्वजनिक हुनुले मुलुकको न्यायालयको अवस्था के छ भनेर छर्लंग भएको बताएकी छन् ।

प्रतिनिधिसभाको आजको बैठकको विशेष समयमा बोल्दै उनले नेपालको न्यायालय कस्तो छ भनेर जनताले देख्ने गरी बाहिरिनु दुःखद् भएको बताइन् ।

केही दिनअघि सञ्चारमाध्यमबाट काठमाडौँ जिल्ला अदालतका न्यायाधीश राजकुमार कोइराला र नेपाल बार एशोसिएशनका पूर्वकोषाध्यक्ष अधिवक्ता रुद्र पोखरेलबीचको घुस लेनदेन भएको भनिएको संवाद सार्वजनिक भएको थियो । उक्त घटनाको सर्वत्र विरोध भइरहेका बेला यो विषयले सदनमा समेत प्रवेश पाएको छ । 

राज्यको कोषबाट तलबभत्ता बुझ्नेहरू सेटिङमा पैसा कमाउन लागेको आरोप लगाउँदै सांसद सिटौलाले भनिन्, ‘सबै सेटिङमा घुस खाने, पैसा जोड्ने, गाडी जोड्ने, घर बनाउने, जनता हेरिरहने ?’

उनले आर्थिक वृद्धिलगायत विविध कारणले देश डुबिरहेको अवस्थामा त्यसको मौका छोपी सेटिङ गरेर देशका अमूक संगठनमा बस्नेहरू घुसबाट धन कमाइरहेको भन्दै सदनको ध्यानाकर्षण गराइन् । ‘यसका बारेमा सिंगो संसद् एकजुट हुनुपर्छ कि पर्दैन ?’ उनले सदनमा प्रश्न गरिन् ।

उनले यस्ता गम्भीर विषयमा सबै सांसदहरु, सरकार र प्रतिपक्षको रूपमा विभाजित नभइ सिंगो आवाज बन्नुपर्नेमा जोड दिइन् । उनले देश डुबाउनेहरूलाई खबरदारी गर्न जरुरी रहेको पनि औँल्याइन् ।

सम्बन्धित खबरहरु