Nepalese Flag २०७८ जेठ ३० गते आइतबार   |   June 13, 2021

टीकापुर अस्पताललाई बेलायतबाट स्वास्थ्य सामग्री प्रदान

न्युज कारोबार काठमाडौं जेठ १७, २०७८       

टीकापुर अस्पताललाई बेलायतबाट स्वास्थ्य सामग्री प्रदान

कैलालीको टीकापुर अस्पताललाई बेलायतमा बस्दै आएका तीन युवा व्यवसायीले स्वास्थ्य सामग्री प्रदान गरेका छन् । झापा बाह्रदशी गाउँपालिका राजगढ स्थायी घर भई बेलायतमा एक दशकभन्दा बढी बस्दै आएका टंक भट्टराई र काठमाडौँ घर भएका आशिष महर्जन र जेनिस गिरीको संयुक्त प्रयासबाट पाँच वटा अक्सिजन कन्सन्ट्रेटर अस्पताललाई आइतबार हस्तान्तरण गरिएको हो ।

स्वास्थ्य क्षेत्रमा काम गरिरहेका डा. अभिषेक न्यौपानेमार्फत टीकापुर अस्पतालका सुपरिटेन्डेन्ट डा. रेमकुमार राईलाई पाँच लाख रूपैयाँ बराबरको उक्त कन्सन्ट्रेटरहरू एक कार्यक्रमका बीच प्रदान गरिएको थियो । बेलायतमा स्थापित समाजसेवीका रूपमा परिचित भट्टराई परोपकारी संस्था कोडेकका अध्यक्षसमेत छन् । उनले गिरीसँगै मिलेर हचटिआर नामक मानव श्रम व्यवस्थापनमार्फत स्वास्थ्य क्षेत्रमा रोजगारीसमेत दिँदै आइरहेका छन् । त्यस्तै महर्जन पेशाले इन्जिनियर छन् । उनले भट्टराईकै संस्थामा प्राविधिकरूपमा सहयोग गरिरहेका छन् ।

'तीनै जना कोभिड संक्रमित भई हाल निको भएका छौँ, बेलायत जस्तो देशमा त हामीलाई यति गाह्रो भयो भने नेपालमा कति गाह्रो होला भन्ने सोचेर हामी तीन जनाले सहयोग गर्ने निर्णय गरेका हौँ,' भट्टराईले भने । भट्टराई अध्यक्ष रहेको परोपकारी संस्थाले पनि कोरोना संक्रमितका लागि सहयोग गर्दै आएको छ । (रासस)

सम्बन्धित खबरहरु