Nepalese Flag २०७८ जेठ ३० गते आइतबार   |   June 13, 2021

झापामा अधिकांश संक्रमित जाँदैनन् अस्पताल, घरमै उपचार

न्युज कारोबार काठमाडौं जेठ ३, २०७८       

झापामा अधिकांश संक्रमित जाँदैनन् अस्पताल, घरमै उपचार सांकेतिक तस्बिर

नयाँ भेरिएन्टसहितको कोरोना भाइरसका कारण बिरामी बनेकामध्ये झापाका अधिकांश नागरिकले घरमै घरेलु उपचार गराउने गरेको पाइएको छ । आफूलाई कोरोना संक्रमण भएको थाहा हुनासाथ संक्रमितले छुट्टै होम आइसोलेसनमा बसेर बेसार पानी, गुर्जो, अदुवाको रस, पिप्ला, मरिच र तुलसीका पात पकाएर सेवन गर्नुका साथै कागतीको रस एक दुई थोपा नाकमा दिनहुँ हाल्ने गरेको पाइएको हो । सास फेर्न समस्या देखिए सकभर घरमै अक्सिजन सिलिण्डर लाने र अक्सिजन सिलिण्डर नपाए मात्रै उपचारका लागि अस्पताल जाने गरेका छन् ।

गौरीगञ्ज गाउँपालिकामा कोरोनाको दोस्रो भेरिएन्टपश्चात् आजसम्म ६० सक्रिय सङ्क्रमित रहेका छन् । गाउँपालिकाको स्वास्थ्य शाखा कार्यालयले उपलब्ध गराएको विवरणअनुसार संक्रमितमध्ये ५० जना होम आइसोलेसनमा छन् भने दुई जनाले कोशी अस्पतालमा उपचार गराइरहेका छन् । कूल संक्रमितमध्ये एक जनाको मुत्यु भइसकेको छ ।

दोस्रो भेरिएन्ट देखा परेपश्चात् गाउँपालिकाद्वारा १२२ जनाको स्वाव संकलन गरिएको स्वास्थ्य शाखाप्रमुख रामचन्द्र मिश्रले बताए । कोरोना संक्रमित ६० मध्ये सात जना संक्रमण मुक्त भइसकेका छन् । कोरोना रोकथाम तथा नियन्त्रण गर्न गाउँपालिकाले १५ शय्याको आइसोलेसन र ८ वटा अक्सिजन सिलिन्डर तयारी अवस्थामा राखेको छ । पचास शय्या क्वारेन्टिन कोरोना संक्रमित बिरामीका लागि तयारी अवस्था राखिए पनि दोस्रो भेरियन्टपछि कोही पनि बिरामी अस्पताल आएका छैनन् । शय्याहरू खाली छन् । बिरामीले घरमै उपचार गराइरहेका छन् । 

गाउँपालिकाका स्वास्थ्य शाखाका प्रमुख रामचन्द्र मिश्रले नेपाल सरकारको प्रोटोकलअनुसार नै बिरामी होम आइसोलेसनमा बसेको बताए । उनले होम आइसोलेसनमा बसेका बिरामीहरुसँग नियमितरूपमा स्वास्थ्यकर्मीहरुको सम्पर्क भइरहेको र उनीहरुको स्वास्थ्य अवस्थामा क्रमिक सुधार हुँदै गरेको जानकारी दिए ।

गौरीगञ्जमा मात्र होइन झापाका हरेक स्थानीय तहका नागरिकले कोरोना संक्रमित भएको खण्डमा घरमै उपचार गराउँदै आएका छन् । सन्तोष आचार्य, पुष्प बराल, वीरबहादुर दर्नाल, गोपाल काफ्ले, पर्वत पोर्तेललगायतका पत्रकारहरु पनि कोरोना संक्रमणपछि घरमै उपचार गराएर स्वास्थ्यलाभ गरिरहेको नेपाल पत्रकार महासंघ झापाका अध्यक्ष एकराज गिरीले जानकारी दिए । (रासस)

सम्बन्धित खबरहरु