Nepalese Flag २०७८ जेठ ३० गते आइतबार   |   June 13, 2021

'सहज वातावरण नभएको' भन्दै निर्माण कम्पनीले नै रोक्यो अरुण तेस्रोको काम

न्युज कारोबार सिन्धुपाल्चोक जेठ १, २०७८       

'सहज वातावरण नभएको' भन्दै निर्माण कम्पनीले नै रोक्यो अरुण तेस्रोको काम अरूण तेस्रोको ड्यामसाइड क्षेत्र । (तस्बिर : रासस)

संखुवासभाको निमार्णाधीन ९०० मेगावाटको अरुण तेस्रो जलविद्युत् परियोजनाको विद्युत् गृहस्थलको काम बुधबारदेखि ठप्प भएको छ । सुरुङभित्र मजदूरको मृत्यु भएपछि क्षतिपूर्तिको माग गर्दै मजदूरले आयोजना स्थलका निर्माण सामग्रीमा तोडफोड गरेका थिए ।

अवरुद्ध भएको अरुण तेस्रो आयोजनाको काम सञ्चालन गर्न सतलज कम्पनी र सरोकारवाला निकायसँग छलफल भइरहेको र चाँडै आयोजनाको काम सञ्चालन गर्ने संखुवासभा प्रमुख जिल्ला अधिकारी टेकनारायण पौडेलले जानकारी दिए । बुधबार बिहान साढे ८ बजे सुरुङभित्र बारुद राख्ने गर्ने क्रममा माथिबाट खसेको ढुंगाले लागेर कञ्चनपुर शुक्लाफाँट नगरपालिका- १२ का ३७ वर्षीय कृष्ण रानाको मृत्यु भएको थियो भने सोही स्थानका ५० वर्षीय मिठु राना  घाइते भएका थिए । विद्युत् गृह निर्माणको जिम्मेवारी पाएको पटेल इञ्जिनीयरिङ लिमिटेडले जिम्मेवारीबाट पन्छिन खोजेको भन्दै कामदार दिनभर आन्दोलित भएका थिए ।

शव व्यवस्थापनका लागि चन्दा संकलन गर्ने भनेपछि कामदारले आयोजनाको कार्यालय र सवारी साधनमा ढुंगामुढा गरेका थिए । कामदारहरु आक्रोशित भएपछि निर्माण कम्पनीले ५० हजार क्षतिपूर्ति दिने भने पनि ५० लाख बिमा रकम हुने भन्दै सो रकमको माग गरेको मृतकका भाइ रामस्वरुप रानाले बताए । अन्त्यमा आयोजनाले ३० लाख दिने सहमति जनाएपछि शव जिम्मा लिएको मृतकका भाइ रामले बताए ।

मृत्यु भएका मजदूरको शव परिवारले जिम्मा लिए पनि विद्युत् गृहको निर्माण कार्य सुरु हुन सकेको छैन । काम गर्ने सहज वातावरण नभएको भन्दै सहज परिस्थिति नभएसम्म काम सुरु गर्न नसक्ने भारतीय सतलज जलविद्युत् निगम (एसजेभीएन) प्रमुख कार्यकारी अधिकृत अरुण धिमानले बताए । नेपाल सरकारले सुरक्षाको प्रत्याभूति गराए मात्र आयोजनाको काम सुरु गर्न सक्ने उनले जानकारी दिए । जुनसुकै घटनामा क्षतिपूर्तिका नाममा ठूलो रकमको माग गर्दै आयोजनामा अवरोध गर्ने गरेकाले काम गर्न असहज भएको उनको भनाइ छ । धिमानले भने, 'परियोजना विकास सम्झौता (पीडीए)मा उल्लेख भएभन्दा बाहिरको काम गर्न हामी सक्दैनौँ ।'

कूल एक खर्ब ४४ अर्ब लागत निर्माण भइरहेको अयोजनाको काम २०२२ मा उत्पादन सुरु गर्ने लक्ष्य लिएको छ । अरुण तेस्रो जलविद्युतकाे निर्माणको काम एसजेभीएनले गरिरहेको छ । मकालु गाउँपालिका- ५, फ्याक्सिन्दा दोभानमा अरुण तेस्रो बाँधस्थल र चिचिला गाउँपालिका- २, दिदिङ पुखुवामा विद्युत् गृहस्थलमा निर्माण कार्य भइरहेको छ । विद्युत् गृहस्थल पुखुवामा भारतीय पटेल इञ्जिनीरिङ कम्पनीले काम गरिरहेको छ । यी दुई कम्पनीमार्फत अन्य २० भन्दा बढी साना निर्माण कम्पनीले काम गरिरहेको आयोजनाले जनाएको छ । अरुण तेस्रो जलविद्युत् परियोजनामा भारतीय र नेपालीसहित तीन हजारभन्दा बढी मजदूर कार्यरत छन् । (रासस)

सम्बन्धित खबरहरु