ज्योति लाइफ इन्स्योरेन्स नेपालको जीवन बिमा जगतमा २०७४ साल भदौ १९ गतेदेखि औपचारिक रुपमा उदाएको कम्पनी हो । बिमाको पहुँच विस्तार गर्ने, बिमा साक्षरता बढाउने र जीवन बिमाप्रति आम जनमानसमा सकारात्मकता ल्याउने उद्देश्यले स्थापित कम्पनीले स्थापना कालदेखि नै प्रविधिमैत्री सेवा प्रदान गर्दै आएको छ ।

काठमाडौँको ज्ञानेश्वर स्थित पशुपति रोड शान्ता प्लाजामा प्रधान कार्यालय रहेको यो कम्पनी छोटो अवधिमै जीवन बिमा क्षेत्रमा लोभलाग्दो व्यावसायिक उचाइ कायम गर्दै गएको छ । कम्पनीका वित्तीय सूचकले लगातार उकालो ग्राफ बनाइरहेको हरेक त्रैमासका प्रतिवेदनले स्पष्ट गर्छन् ।

चालू आर्थिक वर्ष २०७७/७८ को दोस्रो त्रैमाससम्मको वित्तीय विवरणअनुसार चुक्ता पुँजी १ अर्ब ५४ करोड रुपैयाँ रहेको ज्योति लाइफको जगेडा कोषमा ४८ करोड २४ लाख रुपैयाँ सञ्चित छ । गत आर्थिक वर्षको सोही अवधिमा कम्पनीको जगेडा कोषमा ३३ करोड ४६ लाख रुपैयाँ सञ्चित थियो । समीक्षा अवधिमा कम्पनीको जगेडा कोषको आकार ४४.१७ प्रतिशतले बढेको हो ।

जीवन बिमा कोष

चालू आर्थिक वर्षको पुससम्ममा कम्पनीको जीवन बिमा कोषमा २ अर्ब ९१ करोड ७९ लाख रुपैयाँ छ । गत वर्षको सोही अवधिमा कम्पनीको जीवन बिमा कोषमा १ अर्ब २० करोड ८१ लाख रुपैयाँ थियो । समीक्षा अवधिमा कम्पनीको जीवन बिमा कोष १ अर्ब ७० करोड ९८ लाख रुपैयाँले बढेको हो ।

कुल बिमा शुल्क

चालू आवको दोस्रो त्रैमाससम्ममा कम्पनीले ४ अर्ब ६३ करोड ७३ लाख रूपैयाँ कुल बिमा शुल्क आर्जन गरेको छ । गत वर्षको सोही अवधिमा कम्पनीले २ अर्ब ५ करोड ३९ लाख रुपैयाँ कुल बिमा शुल्क आर्जन गरेको थियो । गत वर्षको सोही अवधिको तुलनामा कम्पनीको कुल बिमा शुल्क आर्जन १२५.७८ प्रतिशतले धेरै हो ।

खुद बिमा शुल्क

चालू आवको ६ महिनामा ज्योति लाइफले १ अर्ब ३९ करोड ६७ लाख रुपैयाँ खुद बिमा शुल्क आर्जन गरेको छ । गत वर्षको सोही अवधिको भन्दा यो बिमा शुल्क ९२.५४ प्रतिशत धेरै हो । गत वर्षको सोही अवधिमा कम्पनीले ७२ करोड ५४ लाख रुपैयाँ खुद बिमा शुल्क आर्जन गरेको थियो ।

खुद नाफा

चालू आवको पुससम्ममा ज्योति लाइफ इन्स्योरेन्सले १० करोड ७८ लाख रुपैयाँ खुद नाफा गरेको छ । गत वर्षको सोही अवधिमा कम्पनीको खुद नाफा ६ करोड ८९ लाख रुपैयाँ थियो । समीक्षा अवधिमा खुद नाफा ५६.४६ प्रतिशतले बढेको हो ।

दाबी भुक्तानी

चालू आवको ६ महिनासम्ममा कम्पनीले ३ करोड १ लाख ४७ हजार रुपैयाँ कुल दाबी भुक्तानी गरेको छ । गत वर्षको सोही अवधिमा कम्पनीले  ४६ लाख १५ हजार रुपैयाँ कुल दाबी भुक्तानी गरेको थियो । यो अवधिमा कम्पनीले सबै १०४ वटा दाबी भुक्तानी गरेको वित्तीय विवरणमा उल्लेख छ ।

जारी बिमालेख

चालू आवको पुससम्ममा कम्पनीले ७४ हजार ७०३ वटा बिमालेख जारी गरेको छ । गत आवको सोही अवधिमा कम्पनीले ३६ हजार ६६३ वटा बिमालेख जारी गरेको थियो ।

अन्य सूचक

चालू आवको पुससम्ममा कम्पनीको प्रतिसेयर आम्दानी वार्षिक १४ रुपैयाँ पुगेको छ । गत वर्षको सोही अवधिमा ८ रुपैयाँ ९५ पैसा थियो । त्यस्तै कम्पनीको प्रतिसेयर नेटवर्थ १३४ रुपैयाँ ८१ पैसा छ ।

हाल संस्थापक सेयरधनीको १ अर्ब ५४ करोड रुपैयाँ चुक्ता पुँजी रहेको कम्पनीले ६६ करोड रुपैयाँबराबरको ६६ लाख कित्ता सेयर जारी गर्नका लागि नेपाल धितोपत्र बोर्डबाट अनुमति पाइसकेको छ । कम्पनीले सेयर निष्कासन तथा बिक्री प्रबन्धकमा एनएमबी क्यापिटललाई नियुक्त गरेको छ । सर्वसाधारण सेयर जारी भएसँगै कम्पनीको कुल चुक्ता पुँजी २ अर्ब २० करोड रुपैयाँ पुग्नेछ ।

चुस्त व्यवस्थापकीय क्षमता भएका प्रकाशविक्रम खत्री कम्पनीको प्रमुख कार्यकारी अधिकृत छन् । बेलायतको बार्कलिज बैँकमा काम गरेको अनुभव सम्हालेका उनी केही वर्ष लक्ष्मी बैँक र एनआईसी एसिया बैँकमा कार्यरत रहे । बिमा क्षेत्रमा खत्री नेपाल लाइफ इन्स्योरेन्स कम्पनीदेखि प्रवेश गरेका हुन् । ज्योति लाइफमा उनी २०७७ वैशाख २१ गतेदेखि चार वर्षका लागि प्रमुख कार्यकारी अधिकृतमा नियुक्त भएका हुन् ।

कम्पनीको सञ्चालक समिति अध्यक्ष नन्दकिशोर शर्मा हुन् भने सञ्चालकमा आकाश गोल्छा, शर्मिला श्रेष्ठ महर्जन र जयन्तकुमार अग्रवाल छन् । पुस मसान्तसम्ममा कम्पनीले देशभर ११७ वटा शाखा कार्यालयमार्फत बिमा सेवा प्रदान गर्दै आएको छ ।

प्रकाशित समय : १६:३० बजे