जनता बैंक नेपालको आयोजनामा रसुवाका दुई स्थानमा तीन दिने बृहत निःशुल्क स्वास्थ्य शिविर तथा आँखा शिविर सम्पन्न भएको छ । संस्थागत सामाजिक उत्तरदायित्वमा ग्रामीण स्वास्थ्यलाई प्राथमिकतामा राख्दै स्वास्थ्य शिविर आयोजना गरिएको बैंकद्वारा जारी विज्ञप्तिमा उल्लेख छ ।

रसुवाको नौकुण्ड गाउँपालिकामा मंसिर २५ गते स्त्री तथा प्रसूति रोग, छालासम्बन्धी रोग र सामान्य स्वास्थ्य परीक्षण गरिएको छ भने मंसिर २५, २६ र २७ गते आँखा परीक्षण तथा मोतिबिन्दुको शल्यक्रिया गरिएको छ । त्यस्तै, रसुवाकै कालिका गाउँपालिकामा मंसिर २६ गते स्त्री तथा प्रसूति रोग, छालासम्बन्धी रोग र सामान्य स्वास्थ्य परीक्षण गरिएको थियो ।

स्वास्थ्य शिविरमा ८ सय ४६ जनाको बृहत स्वास्थ्य परीक्षण गरिएको छ, जसमध्ये ५४ जनाको शिविर स्थलमै मोतिबिन्दुको शल्यक्रिया गरिएको छ । बिरामीलाई आवश्यक औषधी र चश्मा निःशुल्क प्रदान गरिएको छ । स्त्रीरोगसम्बन्धी उपचारका लागि लक्षित गरिएको शिविरमा पाठेघरको शल्यक्रिया गर्नुपर्ने गरी पहिचान भएका बिरामीलाई अस्पतालमा रिफर गरिएको छ । यसरी रिफर गरिएका महिलाको पनि बैंकले अपरेसन शुल्क तिरिदिनेछ ।

नेपाल नेत्र ज्योती संघअन्तर्गत भरतपुर आँखा अस्पताल र अल्का अस्पताल जावलाखेलको प्राविधिक सहयोगमा बैंकले स्वास्थ्य शिविर आयोजना गरेको हो । बैंकले विशेष गरी स्त्री तथा प्रसूति रोगसम्बन्धि र आँखा उपचारका लागि निःशुल्क स्वास्थ्य शिविर सञ्चालन गर्दै आएको छ ।

प्रकाशित समय : १८:२२ बजे