गृहपृष्ठ सुनसरीमा डेंगुको संक्रमण बढ्यो, ११ जना बिरामी भेटिए
सुनसरीमा डेंगुको संक्रमण बढ्यो, ११ जना बिरामी भेटिए
सुनसरी सदरमुकाम इनरुवामा डेंगु संक्रमित बिरामीको संख्या ह्वात्तै बढेको छ । केही साताअघि देखापरेको डेंगु नियन्त्रणमा आएको बताइरहँदा पछिल्लो पटक इनरुवामा एकैपटक ११ जना डेंगु संक्रमित बिरामी फेलापरेका छन् ।
इनरुवा नगरपालिकाको कार्यालयले नगरभित्र ११ जनामा डेंगुको संक्रमण पाइएको पुष्टि गरेको छ । इनरुवा अस्पतालको आकस्मिक कक्षले समेत डेंगु संक्रिमत संख्या बढ्दो क्रममा रहेको जनाएको छ । आकस्मिक कक्षमा कार्यरत सिनियर अहेब गुणानन्द झाका अनुसार नमुना परीक्षणका क्रममा २० जना भन्दा बढीमा डेंगुको संक्रमण देखिएको छ ।
इनरुवा–४ को एकै परिवारका ७ जनामा डेंगुको संक्रमण भेटिएको इनरुवा अस्पतालले जनाएको छ । ज्वरो आएर उपचारका लागि अस्पताल आउने बिरामीको संख्या बढ्दो क्रममा रहेकाले संक्रमित संख्या बढ्न सक्ने स्वास्थ्यकर्मीको अनुमान छ । नगरभित्र एकसाथ डेंगुका बिरामी फेलापरेपछि इनरुवा नगरपालिकाको कार्यालयले आपतकालीत बैठक समेत डाकेको छ । नगरपालिकाको कार्यालयले कार्यपालिकाको बैठकबाट डिल्ली निरौलाको संयोजकत्वमा डेंगु नियन्त्रण तथा प्रचारप्रसार समितिसमेत गठन गरिएको जानकारी दिएको छ ।
प्रकाशित समय : १२:४६ बजे