वैशाख १४ गते बसेको मन्त्रिपरिषद बैठकले विभिन्न शिर्षकमा सरकारलाई राजस्व बुझाउनुपर्ने अवधि जेठ २५ सम्मका लागि बढाएको छ । बैठकले अर्थ मन्त्रालयलाई राजश्व बुझाउनुपर्ने अवधि बढाउन सिफारिस गर्ने निर्णय गरेको हो ।

आयकर ऐनबमोजिम फागुन र चैत महिनामा बुझाउनुपर्ने अग्रिम करकट्टी र अग्रिम कर असुलीको विवरण बुझाउने म्याद आगामी जेठ २५ सम्म तोकिएको छ । आयकरअन्तर्गत चैतमा बुझाउनुपर्ने यस आर्थिक वर्षको संशोधित अनुमानित कर विवरण र दोस्रो किस्ता वापतको रकम दाखिल गर्ने म्याद जेठ मसान्तसम्म थप्ने निर्णय मन्त्रिपरिषदले गरेको हो ।

अब गत फागुन र चैतको मासिक मूल्य अभिवृद्धि कर, माघ-फागुनको द्वैमासिक र दोस्रो चौमासिक अवधिको मूल्य अभिवृद्धि कर दाखिल गर्ने म्याद जेठ २५ सम्म थप गरिनेछ । यसका साथै फागुन र चैत महिनाको अन्तःशुल्क दाखिल गर्ने म्याद पनि जेठ २५ सम्म थपिने निर्णय भएको छ ।

प्रकाशित समय : ००:२५ बजे